صفحة نت …

 

 

 

مجرد حكي خطر عبالي ..

 

 

 

 

 

و أنا بلفلف بين صفحات النت بحكي سبحان الله قديش الدنيا صغيرة , رغم انها كتير كبيرة , و كيف الاشي اللي بكتبه بفلسطين بقرأه بنفس الوقت ناس بدول تانية , فرّقتها حدود ومساحات . حتى صاحباتي اللي بداخل فلسطين , كيف بحكي معهم وكل وحدة بمنطقة , رغم انه مرّات بكون بيناتنا مجرد امتار وما بتيجي فرصة نحكي .

صارت صفحة النت تجمع و تفرّق, مش لأنها هي بتعمل هيك , بس لأنا إحنا موجودين فيها

رغم كتير من حسانته الا انه مرات بفاجأك بوجه تاني, بكبسة وحدة على ايقونة معينة بتصير ولا اشي, بتصير ممحي , ملغي…

بالحقيقة صعب كتير حد يلغي حد بالدنيا , الا اذا قتله , بس وقتها في قانون , محكمة , عقاب.. بس بصفحة النت لأ, ما في قانون ولا محكمة تحاكم الجاني.

ما في اي قانون يرد لك اعتبارك , بتحس انك مبعثر بتبلش تلم شظاياك  و لتحافظ على كبريائك بترد بنفس الطريقة و بتدعس عنفس الكبسة اللي قامت بتشتيتك ولو للحظات .. اويمكن لكثير من اللحظات.

ما بعرف ليش جاي ببالي أكتب, بس بعرف  انك ممكن تلغي كثير اشياء وانت بصفحة النت , ممكن تلغي قلبك , مشاعرك , بسمتك , دمعتك , جديتك أو مزحك , ..إلخ..

بس كبريائك و كرامتك اللي عأرض الواقع ما حد قدر يطب فيهم أو يجرحهم , اللي عأرض الواقع أكبر عدو الك , العدو الصهيوني , ما قدر يهزمهم , صعب , صعب كتير تسمح لأيِ كان بالدنيا , مهما زادت غلاوته عندك  , إنه يجرحهم , بس لمجرد إنك ….بصفحة نت …!!